ནམ་མཁའི་རྒྱལ་སྲིད་ལ་གང་པོ་སྨྲས་ཏེ་ཆེན་པོ་སུ་ཡིན་པ།
༡ འོ་ཙམ་གང་ལ་(འོ་གང་ལ་)ཉེ་གནས་ཡ་འོངས་ཏེ་ཡེ་ཤུ་ལ་འདྲི་ཟིན། ནམ་མཁའི་རྒྱལ་སྲིད་ལ་གང་པོ་སྨྲས་ཏེ་ཆེན་པོ་(གང་པོ་ལས་ཆེ་བ་)སུ་ཡིན་པ། སྨྲས་ཏེ་འདྲི་ཟིན། ༢ དེ་ནས་ཡེ་ཤུས་བུ་ཚ་གཅིག་ལ་ཤོག་སྨྲས་ཏེ་(སྐད་བརྒྱབ་སྟེ་)ཁོང་གི་བར་དཀྱིལ་ལ་ལང་བཅུག་སྟེ་ ༣ སྨྲ་ཟིན། ངས་སྨྲ་མཁན་གྱི་སྐད་ཆ་ལ་ཉན་ཏེ་ཞོག (ངས་ཁྱེད་ལ་བདེན་པར་སྨྲ་མཁན།) ཁྱེད་རང་གི་སེམས་ཀྱི་བསམ་བློ་གྱུར་ཏེ་བུ་ཚ་ཅོག་འདྲ་མི་འོང་ན་ཁྱེད་ཅི་བྱས་ཏེ་ཡང་ནམ་མཁའི་རྒྱལ་སྲིད་ལ་འཇུག་མྱོང་ཅེས་མེད། ༤ འདི་བུ་ཚ་ཅོག་འདྲ་སྙེམས་ཆུང་འོང་མཁན་གྱི་མི་ནམ་མཁའི་རྒྱལ་སྲིད་ལ་གང་པོ་སྨྲས་ཏེ་རྩིས་ཆེན་པོ་(གང་པོ་ལས་རྩིས་ཆེ་བ་)འོང་མཁན་ཡིན་པ། ༥ ལྟོས་ཨ། ངའི་མིང་ལ་འདི་ཅོག་འདྲའི་བུ་ཚ་ལ་ཤོག་སྨྲས་ཏེ་(སྐད་བརྒྱབ་སྟེ་)ཅག་ག་བྱེད་མཁན་དེ་གིས་ང་ལ་རང་ཤོག་སྨྲས་པ་(སྐད་བརྒྱབ་པ་)ཡིན་པ། སྨྲས་ཏེ་ཡེ་ཤུས་སྨྲ་ཟིན།།
དབང་མེད་པའི་མི་ལ་ལམ་ནག་པོ་ལ་འཇུག་འཇུག་མཁན་གྱི་སྐད་ཆ་ཡ་ལས་འཛེམ་དགོས་མཁན།
༦ ༼དེ་ནས་གཉིས་པར་(ཡོད་པར་)ཡེ་ཤུས་སྨྲ་ཟིན།༽ ང་ལ་བློ་འགེལ་མཁན་འདི་ཅོག་འདྲའི་དབང་མེད་པའི་མི་གཅིག་ལ་ལམ་ནག་པོ་ལ་འཇུག་འཇུག་མཁན་གྱི་མི་ལ་ནི་ལག་འཁོར་གཅིག་འཇིང་པ་ལ་འཕྱངས་ཏེ་རྒྱ་མཚོ་ལ་སྐྱུར་ན་ཡག་པོ། ༧ འདི་འཛམ་བུ་གླིང་གི་དོན་དག་ལ་ག་འདྲ་སྡུག་པོའི་སྐད་ཆ། འདི་འཛམ་བུ་གླིང་ལ་མི་ལ་ལམ་ནག་པོ་ལ་འཇུག་འཇུག་མཁན་གྱི་སྐད་ཆ་ཡ་འོང་ཅེས་ནི་འོང་མཁན། ཡིན་ནས། འོ་ཅོག་འདྲའི་སྐད་ཆ་ཡ་འཁྱོང་མཁན་གྱི་མིའི་གནས་སྟངས་འཇིགས་པོ་རང་བཙོག་པ་(བཙོག་པ་འཇིགས་པོ་)འོང་ཅེས་ཡོད།།
༨ ཁྱོད་རང་གི་ལག་པ་རྐང་པས་རང་ལ་ལམ་ནག་པོ་ལ་འཇུག་འཇུག་ན་འོ་ལག་པ་རྐང་པ་གཏུབས་ཏེ་དབྱུགས་རྫོང་། ལག་པ་རྐང་པ་གཉིས་ཀ་རང་འཐོགས་ཏེ་ནམ་ཡང་མི་འཆི་མཁན་གྱི་མེ་ལ་ཆུད་མཁན་སྨྲས་ཏེ་ནི་(ལས་ནི་)ལག་པ་རྐང་པ་མེད་པ་བྱས་ཏེ་ཚེ་འབྱོར་མཁན་དེ་ཡག་པོ། ༩ འོ་ཅོག་འདྲ་བྱས་ཏེ། ཁྱོད་རང་གི་མིག་གིས་རང་ལ་ལམ་ནག་པོ་ལ་འཇུག་འཇུག་ན་འོ་མིག་བཏོན་ཏེ་དབྱུགས་རྫོང་། མིག་གཉིས་ཡོད་དེ་དམྱལ་བ་ལ་ཆུད་མཁན་སྨྲས་ཏེ་ནི་(ལས་ནི་)མིག་གཅིག་མེད་པ་བྱས་ཏེ་ཚེ་འབྱོར་མཁན་དེ་ཡག་པོ། སྨྲས་ཏེ་ཡེ་ཤུས་སྨྲ་ཟིན།།
སྟོར་བའི་ལུག་ལ་དཔེ་བཞག་པ།
༡༠ ༼དེ་ནས་གཉིས་པར་ཡེ་ཤུས་སྨྲ་ཟིན།༽ འདི་སྐད་ཆ་དྲན་པ་གསོ་དོང་། འདི་ཅོག་འདྲའི་དབང་མེད་པའི་མི་གང་དྲ་ཞིག་ལ་ཡང་སྐྱོན་མ་ལྟ། ངས་ཁྱེད་ལ་སྨྲ་མཁན། ཁོང་རེ་རེ་ལ་ལྟ་མཁན་གྱི་ཨལ་གྱི་ལོན་སྐྱེལ་མཁན་ཡ་ནམ་བྱེད་ན་ཡང་ནམ་མཁའ་ལ་སྡོད་མཁན་གྱི་ངའི་ཨ་ཕའི་མདུན་ལ་ཡོད། ༡༡ ཅི་ལས་སྨྲ་ན་མིའི་བུ་ནི་སྟོར་བ་ཡ་ལ་ཐར་འཇུག་ཅེས་ལ་འོངས་པ་ཡིན་པ།།
༡༢ མི་གཅིག་དེ་ལུག་བརྒྱ་ཐམ་པ་ཡོད་ན། དེ་ནས་འོ་ལུག་བརྒྱ་ཐམ་པའི་ནང་ལས་གཅིག་སྟོར་ན་ཁོས་ཅི་བྱེད་མཁན། ཁྱེད་ཀྱི་སེམས་ལ་ཅི་གནས་འོ་ནུ་བ། (ཁྱེད་ཀྱིས་བསམ་བློ་ཅི་གཏོང་གོ་ནུ་བ།) ཁོས་བརྒྱ་ཐམ་པ་ལ་གཅིག་གཅོག་པའི་ལུག་ཡ་ལ་སྤང་ཁ་ལ་དབྱུགས་བཞག་སྟེ་སྟོར་བའི་ལུག་ལ་འཚོལ་མི་འགྲོ་མཁན་ནམ། ༡༣ ངས་སྨྲ་མཁན་གྱི་སྐད་ཆ་ལ་ཉན་ཏེ་ཞོག ཁོས་འོ་སྟོར་བའི་ལུག་མཇལ་ཟིན་ཏེ་འགབ་ལས་མ་སྟོར་བའི་ལུག་བརྒྱ་ཐམ་པ་ལ་གཅིག་གཅོག་པ་སྨྲས་ཏེ་ཡང་(ལས་ཀྱང་)འོ་མཇལ་ཟིན་པའི་ལུག་གཅིག་གི་དོན་དག་ལ་དགེ་བ་མང་པོ་བྱེད་མཁན། ༡༤ ནམ་མཁའ་ལ་སྡོད་མཁན་གྱི་ཁྱེད་ཀྱི་ཨ་ཕའི་སེམས་ཀྱང་འོ་ཅོག་འདྲ་རང་ཡོད་པ། འོ་ཅོག་འདྲའི་དབང་མེད་པའི་ཆད་མ་གང་དྲ་ཞིག་ཀྱང་སྟོར་ཏེ་མ་འགྲོ་འཇུག་སྨྲས་ཏེ་(མ་འགྲོ་འཇུག་ཅེས་ལ་)ཨ་ཕའི་སེམས་ལ་སྐྱེས་ཏེ་ཡོད་པ། སྨྲས་ཏེ་ཡེ་ཤུས་སྨྲ་ཟིན།།
ལས་ཀ་ནོར་བ་བཞིག་པའི་ཨ་པོ་འོག་མ་(ཨ་ད་ནོ་)མཉམ་པོ་བྱེད་དགོས་མཁན་གྱི་སྤྱོད་གཤིས།
༡༥ ༼དེ་ནས་གཉིས་པར་ཡེ་ཤུས་སྨྲ་ཟིན།༽ ཨ་པོ་འོག་མ་གཅིག་གིས་ཁྱོད་ཀྱི་ཐོག་ལ་ལས་ཀ་ནོར་བ་བཞིག་པ་བྱས་པ་ཡིན་ན་(ཁྱོད་ལ་དགྲ་བྱས་ཏེ་ངོ་ལོག་བྱས་པ་ཡོད་ན་)ཁྱོད་གཅིག་རང་ཁོའི་རྩར་ལ་ཕྱིན་ཏེ་འོ་སྐད་ཆའི་དོན་དག་ལ་སློབ་ཏོང་། ཁྱོད་ཀྱི་སྐད་ཆ་ལ་ཉན་ན་ཁོ་གཉིས་པར་ཁྱོད་ཀྱི་ཨ་པོ་འོག་མ་འགྲོ་མཁན། ༡༦ ཁོས་མི་ཉན་ན་ནི་མི་གཞན་པ་གཅིག་གཉིས་ཁྱེར་ཏེ་གཉིས་པར་ཁོ་མཉམ་པོ་སྐད་ཆ་སྨྲ་སོང་། སྐད་ཆ་རེ་རེ་མི་སྣ་(མི་)གཉིས་གསུམ་གྱིས་ཤོད་མཁན་གྱི་སྐད་ཆ་ལ་ཉན་ཏེ་ཁྲིམས་གཏོང་དགོས་མཁན། (འཁྲུགས་ཤི་གང་པོ་དག་བཤེར་བྱེད་ཅེས་ལ་མི་སྣ་གཉིས་གསུམ་ཐུག་མི་ཡ་དཔང་པོ་འཇོག་ཅེས་ལ་སྐད་རྒྱབ་དགོས་མཁན།) སྨྲས་ཏེ་བཀའ་ཁྲིམས་ལ་བྲིས་པ་ཅོག་འདྲ་བྱེད་ཏོང་། ༡༧ ཁོས་གཉིས་པར་ཡང་མི་ཉན་ན་འདི་སྐད་ཆ་ཚོགས་ཀྱི་མདུན་ལ་ཁྱོང་སྟེ་ཤོད་ཏོང་། འོ་ཙམ་བྱས་ཏེ་ཡང་ཁོས་ཉིན་རང་མི་ཉན་ན་ཁོ་ཨལ་ལོ་ཧིམ་ལ་དད་པ་ལོག་མཁན་དང་ཤོབ་བརྒྱབ་སྟེ་ཤོ་གམ་སྡུད་མཁན་གྱི་མི་ཅོག་འདྲ་ཡིན་པ་སྨྲས་ཏེ་ཁོ་ལ་དབྱུག་ཞོག
༡༨ ངས་ཁྱེད་ལ་བདེན་པར་སྨྲ་མཁན། འདི་འཛམ་བུ་གླིང་ལ་ཡོད་མཁན་གང་ལ་ཁྱེད་ཀྱིས། འདི་ལས་ཀ་བཙོག་པ་ཡིན་པ་སྨྲས་ཏེ་སྨྲ་མཁན་དེ་ལ་ནམ་མཁའ་ལ་སྡོད་མཁན་གྱི་ཨལ་ལོ་ཧིམ་གྱིས་ཀྱང་བཙོག་པ་སྨྲ་ཅེས་ཡོད། དེ་ནས་ཁྱེད་ཀྱིས། འདི་ལས་ཀ་ཡག་པོ་ཡིན་པ་སྨྲས་ཏེ་སྨྲ་མཁན་དེ་ལ་ཨལ་ལོ་ཧིམ་གྱིས་ཀྱང་ཡག་པོ་སྨྲ་ཅེས་ཡོད།། (ཁྱེད་ཀྱིས་འདི་འཛམ་བུ་གླིང་ལ་ཅི་སྡོམ་མཁན། འོ་ནམ་མཁའ་ལ་ཡང་སྡོམ་ཅེས་ཡོད། དེ་ནས་ཁྱེད་ཀྱིས་འདི་འཛམ་བུ་གླིང་ལ་ཅི་ཁ་འབྱེད་མཁན། འོ་ནམ་མཁའ་ལ་ཡང་ཁ་འབྱེད་ཅེས་ཡོད།།)
༡༩ དེ་ནས་འདི་སྐད་ཆ་ཡང་དྲན་པ་སོས་ཏེ་འཇོག་དོང་། འདི་འཛམ་བུ་གླིང་ལ་ཡོད་མཁན་གང་ལ་ཁྱེད་མི་སྣ་གཉིས་ཀྱིས་སེམས་གཅིག་བྱས་ཏེ་ཅི་ཡང་སློང་ན་ནམ་མཁའ་ལ་སྡོད་མཁན་གྱི་ངའི་ཨ་ཕས་ཁྱེད་ལ་བསླངས་པ་ཅོག་འདྲ་སྟེར་ཅེས་ཡོད། ༢༠ ཅི་ལས་སྨྲ་ན། ངའི་མིང་ལ་མི་སྣ་གཉིས་གསུམ་འཛོམས་ཏེ་སྡོད་མཁན་གྱི་ས་ཆ་ལ་ང་རང་ཁོང་གི་བར་དཀྱིལ་ལ་སྡོད་ཅེས་ཡོད། སྨྲས་ཏེ་ཡེ་ཤུས་སྨྲ་ཟིན།།
རོགས་ལ་གློད་མ་བཏང་བའི་གཡོག་པོ་ལ་དཔེ་བཞག་པ།
༢༡ དེ་ནས་པེ་ཏྲོ་ཡེ་ཤུའི་རྩར་ལ་འོངས་ཏེ། དཔོན་པོ། ངའི་ཐོག་ལ་ལས་ཀ་ནོར་བ་བཞིག་པ་བྱེད་མཁན་གྱི་ཨ་པོ་འོག་མ་ལ་ལན་(ཐེངས་)ག་ཚོད་ཐུག་གློད་གཏོང་དགོས་མཁན། ལན་(ཐེངས་)བདུན་ཐུག སྨྲས་ཏེ་འདྲི་ཟིན། ༢༢ ཡེ་ཤུས་སྨྲ་ཟིན། ལན་བདུན་ཐུག་ཅིག་རང་མིན་པ། ལན་བདུན་ཅུ་འགྱུར་བདུན་༼ཁལ་ཕྱེད་དང་བཞི་བཞི་བདུན་༽ཐུག་གློད་གཏོང་དགོས་མཁན། ༢༣ འོ་སོང་བས་ནམ་མཁའི་རྒྱལ་སྲིད་ནི་འདི་ཅོག་འདྲ་ཡིན་པ།
རྒྱལ་པོ་གཅིག་གིས་རང་གི་གཡོག་པོ་ཡ་གིས་བཟེད་པའི་བུ་ལོན་ཡ་ལེན་ཅེས་སྨྲས་ཏེ་ཨང་རྩིས་བྱེད་ཟིན་ནུ་ལོ། ༢༤ བུ་ལོན་ལེན་མཁན་གང་ལ་གཡོག་པོ་གཅིག་གིས་རྒྱལ་པོ་མཉམ་པོ་གསེར་ཊང་(རྡོ་ཚད་)སྟོང་བཅུ་ཙམ་བུ་ལོན་བཟེད་དེ་ཡོད་མཁན་ནུ་ལོ། ༢༥ ཡིན་ནས་འོ་གཡོག་པོ་མཉམ་པོ་འོ་ཙམ་བུ་ལོན་འཇལ་ཅེས་ཀྱི་ཊང་ཀ་མི་འདུག་ལོ། འོ་སོང་བས་རྒྱལ་པོས་འདི་ཅོག་འདྲ་བཀའ་གནང་ཟིན། ཁོས་བུ་ལོན་གང་ཡོད་མཁན་དེ་འཇལ་རང་དགོས་མཁན། ཁོ་མཉམ་པོ་གང་ཡོད་མཁན་གྱི་བྱད་ལག་གང་པོ། བུད་མེད། བུ་བུ་མོ་དང་རང་གི་རང་ལ་རང་བཙོངས་ཏེ་བུ་ལོན་འཇལ་དགོས་མཁན། སྨྲས་ཏེ་རྒྱལ་པོས་བཀའ་གནང་ཟིན་ནུ་ལོ། ༢༦ འོ་གཡོག་པོ་རྒྱལ་པོའི་མདུན་ལ་འོངས་ཏེ་རྐང་པའི་ཚིགས་བཙུགས་ཏེ་སྨྲ་ཟིན། བདག་པོ། ད་རུང་ཡང་ཉི་མ་གཉིས་ཙམ་སྒུག་དོང་། ངས་ཁྱེར་བའི་བུ་ལོན་གང་པོ་རྒྱལ་པོ་ལ་བཅལ་སྟེར་མཁན། སྨྲས་ཏེ་སྨྲ་ཟིན། (སྨྲས་ཏེ།) ༢༧ འོ་ཙམ་ལ་རྒྱལ་པོའི་སེམས་ཞུས་ཏེ་འོང་ཟིན། དེ་ནས་གཡོག་པོས་ཁྱེར་བའི་བུ་ལོན་གང་ཡོད་མཁན་དེ་གློད་བཏང་སྟེ་ཁོ་ལ་ཡང་གཏོང་ཟིན་ནུ་ལོ།
༢༨ དེ་ནས་འོ་གཡོག་པོ་ཕྱི་ལ་ཐོན་ཏེ་འགྲོ་མཁན་གང་ལ་ཁོས་རང་མཉམ་པོ་ལས་ཀ་བྱེད་མཁན་གྱི་རོགས་གཞན་པ་གཅིག་ལ་ཐུག་ནུ་ལོ། འོ་རོགས་ཀྱིས་ཁོ་ལ་དངུལ་ཊང་བརྒྱ་ཐམ་པ་བུ་ལོན་ལེན་དགོས་ཅེས་ཡོད་མཁན་ནུ་ལོ། དེ་ནས་རོགས་ཀྱི་འཇིང་པ་ལ་བཟུང་སྟེ། ང་མཉམ་པོ་ཁྱེར་བའི་ཊང་ཀ་མགྱོགས་པར་བསློགས་སློངས། སྨྲས་ཏེ་སྨྲ་མཁན་གང་ལ་ ༢༩ འོ་རོགས་དེ་གིས་ས་ལ་རྐང་པའི་ཚིགས་བཙུགས་ཏེ་སྨྲ་ཟིན། ད་རུང་ཡང་ཉི་མ་གཉིས་ཙམ་སྒུག་དོང་། ངས་ཁྱེར་བའི་ཊང་ཀ་གང་པོ་འཇལ་མཁན། སྨྲས་ཏེ་སྨྲ་ཟིན། (སྨྲས་ཏེ།) ༣༠ ཡིན་ནས་རྒྱལ་པོས་གློད་བཏང་བའི་གཡོག་པོ་དེ་གིས་མ་ཉན་ནུ་ལོ། བུ་ལོན་མ་བཅལ་ཐུག་ཁོས་རོགས་ལ་བཙོན་ཁང་ལ་བླུག་འཇུག་ཟིན་ནུ་ལོ།
༣༡ འོ་མི་གཉིས་མཉམ་པོ་ལས་ཀ་བྱེད་མཁན་གྱི་རོགས་གཞན་པ་ཡ་གིས་འདི་གང་པོ་རང་མཐོང་སྟེ་ཞེ་སྡང་ཡང་ལང་ཟིན་ནུ་ལོ། སེམས་ཀྱང་ན་ཟིན་ནུ་ལོ། ཁོང་གིས་རྒྱལ་པོའི་རྩར་ལ་ཕྱིན་ཏེ་འདི་གང་ཡོད་མཁན་གྱི་སྐད་ཆ་གང་པོ་ཤོད་ཟིན་ནུ་ལོ། ༣༢ དེ་ནས་རྒྱལ་པོས་གློད་བཏང་བའི་གཡོག་པོ་ལ་གཉིས་པར་ཡང་སྐད་བརྒྱབ་སྟེ་སྨྲ་ཟིན། ཨེ་གཡོག་པོ། ཁྱོད་ག་འདྲ་ཁོག་པ་ནག་པོ། (ཨེ་མི་ངན་པ།) ཁྱོད་ཀྱི་སྐད་ཆ་ཐོས་ཏེ་ངས་ཁྱོད་ཀྱིས་ཁྱེར་བའི་བུ་ལོན་གང་པོ་གློད་བཏང་སྟེ་ཁྱོད་ལ་ཡང་གཏོང་ཟིན། ༣༣ ངས་ཁྱོད་ལ་སྙིང་རྗེ་བྱས་པ་ཅོག་འདྲ་ཁྱོད་ཀྱིས་ཀྱང་རང་མཉམ་པོ་ལས་ཀ་བྱེད་མཁན་གྱི་རོགས་ལ་སྙིང་རྗེ་བྱེད་མི་དགོས་མཁན་ནམ། སྨྲས་ཏེ་རྒྱལ་པོས་འདྲི་ཟིན་ནུ་ལོ། ༣༤ དེ་ནས་འོ་གཡོག་པོ་མཉམ་པོ་འཇིགས་པོར་ཞེ་སྡང་ལངས་པ་སོང་བས། ཁོས་ཁྱེར་བའི་ཊང་ཀ་གང་པོ་མ་བཅལ་ཐུག་ཁོ་ལ་བཙོན་ཁང་ལ་བླུག་ཞོག སྨྲས་ཏེ་ཁོ་ལ་བཙོན་ཁང་སྲུང་མཁན་གྱི་མི་ཡ་ལ་རྩིས་རྒྱབ་(སྤྲོད་)ཟིན་ནུ་ལོ། སྨྲས་ཏེ་ཡེ་ཤུས་སྨྲ་ཟིན།། (སྨྲས་ཏེ་ཡེ་ཤུས།།)
༣༥ དེ་ནས་འདི་སྐད་ཆ་ཐག་བཅད་དེ་ཡེ་ཤུས་ཉེ་གནས་ཡ་ལ་སྨྲ་ཟིན། འདི་ཅོག་འདྲ་བྱས་ཏེ་ཁྱེད་ཀྱིས་སེམས་གཏིང་ལས་སྙིང་རྗེ་བྱས་ཏེ་ཁྱེད་ཀྱི་ཐོག་ལ་ལས་ཀ་ནོར་བ་བཞིག་པ་བྱེད་མཁན་གྱི་ཨ་པོ་འོག་མ་ལ་གློད་མི་གཏོང་ན་ནི་ནམ་མཁའ་ལ་སྡོད་མཁན་གྱི་ངའི་ཨ་ཕས་ཁྱེད་ལ་ཡང་འོ་རྒྱལ་པོས་བྱས་པ་ཅོག་འདྲ་བྱེད་ཅེས་ཡོད། སྨྲས་ཏེ་ཡེ་ཤུས་སྨྲ་ཟིན།། །།
